Ермантәылатәи аҳақьымцәа, згәабзиара уашәшәыроу ахәыҷқәа ргәаҭарақәа мҩаҧыргоит Аҧсны.

Ауаажәларратә еиҿкаара «Жәларбжьаратәи афонд Аҧсны» аҧшьгарала, апроект «Агәабзиара» аҳәаақәа ирҭагӡаны, Ермантәылатәи Ареспублика аҟынтә Аҧсны иааны иҟоуп иналукааша, зус иазҟазоу аҳақьымцәа.

Иун мза 13, 14, 15, асааҭ 10 инаркны  аҳҭны қалақь Аҟәа имҩаҧысуеит, ДЦП ачымазара змоу ахәыҷқәа хәыда-ҧсада рыдкылара. Уи иадҳәалоу ахарџьқәа зегьы ахахьы иагоит «Жәларбжьаратәи афонд Аҧсны».  Уи азы аиқәышаҳаҭра рыбжьоуп аҧсны агәабзиарахьчара аминистрреи дареи.

Афонд ахада Сенер Гогәа излеиҳәаз ала,  хықәкыс ирымоуп ас еиҧш иҟоу агәыҳалалратә ҟазшьа змоу аусқәа реиҿкаара  аҟны, ҳауаажәлар ацхыраара, адгылара аарҧшра агәаҳәара рыҭара.

«2016-тәи ашықәс зегьы, иара уи анаҩсгьы ахәыҷқәа ргәабзиарахьчара  иадҳәалоу аусқәа ҳхахьы иаҳгеит. Ааигәа, ҳара ҳааҧхьарала,  абри ахырхарҭала Урыстәылантәи аҳақьымцәа-аҟазацәа ааны иҟан, аконференциа мҩаҧаҳгеит. Зегь рҧхьа иргыланы ҳара иаҳҭахәуп ҳхәыҷқәа аҭыҧан иахәҭоу ацхыраара роурц, убри азы аҭыҧантәи аҳақьымцәа рҧышәа аизырҳаразы аҳәаанырцәынтәи аҳақьымцәа ааҳаҧхьаларц. Уажәы Ермантәылантәи аҳақьымцәа ара аусурақәа мҩаҧыргоит, ааҧхьаҟа ҳгәы иҭоуп Европа атәылақәа рҟынтәи аҳақьымцәа ааҧхьара раҳҭарц»-иҳәеит Сенер Гогәуа.

Ермантәылантәи Аҧсны иааны иҟоу зыҩаӡара ҳараку аҳақьымцәа аус руеит, Ереван иалкаау ахәышәтәырҭатә клиникақәа рҿы. Урҭ рхыҧхьаӡараҿы иҟоуп амедициниатә  ҭҵаарадыррақәа рдоктор, апрофессор, ахәыҷтәы ортопед-атравмотолог хада Овсеп Даниелиан, ахәыҷтәы неврологиатә кафедра аҟәша анапхгаҩы Асмик Даниелиан, ахәыҷтәы реабилитолог Гаиане Захариан.

«Сара 30 ш. ҵуеит ахәыҷтәы неврологс аус суеижьҭеи. Ҳара иаҳдыруеит Аҧсны згәабзиара уашәшәыроу ахәыҷқәа рхыҧхьаӡара шырацәоу. Ачымазарақәа еиуеиҧшым. Зегьы дара рхатә азнеишьақәа, ахәышәтәышьақәа  рымоуп. Иахьа, асааҭ 10 инаркны  сҩызцәеи сареи ахәыҷқәа рыдкылара ҳаҿуп. Урҭ рхыҧхьаӡара акырӡа ирацәоуп. Рыхәышәтәышьа акәзар, ҳара ҳметодқәа иахьрықәымшәо ыҟоуп. аҭыҧантәи аҳақьымцәеи ҳареи иааигәаны ҳаибадырит, хымҧада ҳпышәақәа еимаҳдоит. Агәыҳалалра аазырҧшуа ауаа Аҧсны иахьшәымоу даара гәахәала иҳадаҳкылоит»-ҳәа азгәалҭеит Ермантәылатәи аневролог  хада Асмик Даниелиан.

 Згәабзиара уашәшәыроу ахәыҷқәа рҭаацәа ракәзар, ас еиҧш ауснагӡатәқәа реиҿкаара алзыршаз «Жәларбжьаратәи афонд»  анапхгара ҭабуп ҳәа рарҳәоит.

«Аҭаацәа зегьы рсоциалтә ҭагылазаашьа еиҧшым. Иҟоуп Аҧсны анҭыҵ аҽыхәышәтәра зылшоу, иҟоуп уи аҩыза аҭагылазаашьа змам. Сара телехәҧшрала иансаҳа ажәабжь, Ермантәылантәи аҳақьымцәа аауеит ҳәа, ҩыџьа смоҭацәа сыманы сааит. Аҳақьымцәа агәаҭарақәа мҩаҧыргеит. Уажәшьҭа ҳгәы ҳарҭынчит. Иҟаҵатәу ҳабжьыргеит»-лҳәеит Николи, Данили ранду Раиса Қацәҧҳа.

Афонд аҟны иаҧҵоу асоциалтә политика ахеилак анапхгаҩы Иулиа Гәымҧҳа лажәақәа рыла, акрааҵуеит афонд агәабзиарахьчара иадҳәалоу аусқәа рнапы рылакуижьҭеи, илҳәеит аҧхьаҟа уи аҿиара шаҭахо.

Аҳақьым - апедиатор хада,  Ада Абыхәҧҳа излазгәалҭаз ала, ахәыҷқәа рҭаацәа ҭелла адырра рырҭеит, ақалақь хәыҷтәы хәышәтәырҭахь иаарграц, Ермантәылантәи иаан иҟоу аҳақьымцәа рҟны агәаҭарақәа ирхысырц азы. Аҭаацәа ракәзар, ари аҩыза ажәалагала акыр ргәы иахәаны ирыдыркылеит.   

Ермантәылатәи аҳақьымцәа Аҧсны аҧсабара акырӡа ихнахит, аҧсуа исасдкылара акәзар акыр иџьаршьеит. Згәамч ӷәӷәоу, згәабзиара ҭышәынтәалоу  ахәыҷқәа-уаҵәтәи аҳәынҭқарра  аҧеиҧш ауп. Убри азы агәаҳәара аадырҧшит, ахәыҷқәа рдунеи лаша аҧҵаразы, досу имч-илша адиҵарц.

Subscribe to Syndicate