Анела Лакашьиаҧҳа лыхәышәтәразы «Жәларбжьаратәи афонд Аҧсны» 100 нызқь мааҭ аҧара азоунажьит.

Ауаажәларратә  еиҿкаара  «Жәларбжьаратәи афонд  Аҧсны», 10 шықәса зхыҵуа Анела Лакашьиаҧҳа лыхәышәтәразы,  акультура-гәыҳалалратә фонд «Ашана» 100 нызқь мааҭ аҧара ахыҧхьанаӡалеит. Уи зырҵабыргуа ашәҟәы лнапы иаркын, афонд исасны иаҭаз   Анела хәыҷы лан Марина Қәҭарҧҳа.

Анела,  лыцламҳәа-хаҿытә  ҧҟара амҩаҧгаразы, афонд «Ашанеи», «Жәларбжьаратәи афонд Аҧсныи» рымчала еизгоуп 285 нызқь мааҭ. Иаанхаз ахарџь ахахьы иагоит Урыстәылатәи ацхырааратә фонд «Русфонд». Лара аҽыхәышәтәра дахысуеит Москватәи ахәыҷтәы институт ацламҳәа-хаҿытә хирургиаҟны.

«Жәларбжьаратәи афонд Аҧсны» амаӡаныҟәгаҩ хада Асида Инаҧшьҧҳа, Анела лан илзеиҭалҳәеит афонд имҩаҧнаго  аусурақәа ртәы, ахәҭакахьала, агәабзиарахьчара иазку апроект аҳәаақәа ирҭагӡаны, лыӡӷаб хәыҷы афонд ахьӡала ацхыраара шлыҭаз. Анела хәыҷы илзеиӷьалшьеит агәабзиара, аманшәалара, аихьӡарақәа.

Афонд иҟанаҵаз ахаҵгыларазы, Марина Қәҭарҧҳа, афонд ахада Сенер Гогәуа аҧхьа днаргыланы, аусзуцәа зегьы иаадырҧшуа агәцаракразы ҭабуп ҳәа ралҳәеит. 

Subscribe to Syndicate