«Жәларбжьаратәи афонд Аҧсны» Тҟәарчал араион ҳамҭас ианаҭеит акомпиутерқәа хәба

Иаарласны Тҟәарчатәи агәыҳалалра-ааглыхратә ҵараиурҭаҿы иаартхоит акомпиутертә ҽазыҟаҵарҭатә курсқәа.

Иахьа, Тҟәарчалтәи агәыҳалалра-ааглыхратә ҵараиурҭа, «Жәларбжьаратәи афонд Аҧсны» ахьӡала ианашьан акомпиутерқәа ҧшьба. Иара убас, Тҟәарчал араион афонд ахаҭарнакс аусз зуа Виолетта Бигәааҧҳа лзы  компиутерк. Аҳамҭақәа рыманы Тҟәарчал араион иаҭааит «Жәларбжьаратәи афонд Аҧсны» ахада Сенер Гогәуа, асоциалтә политика ахеилак анапхгаҩы Иулиа Гәымҧҳа, арепатриациеи адемографиеи рхеилак анапхгаҩы Сырма Ашәҧҳа.

Тҟәарчалтәи агәыҳалалра-ааглыхратә ҵараиурҭа аартын 1951 ш. азы. Ҳазҭагылоу аамҭазы аҵара рҵоит 80-ҩык астудентцәа. Урҭ ари аҵараиурҭаҿы абас еиҧш иҟоу азаанаҭқәа роурц рылшоит: аиҵбыратә классқәа рырҵаҩы; аекономикеи аҳасабеилыргареи; атехникатә маҵзуреи автомашьынақәа рремонт аҟаҵареи. Аҵараиурҭа хықәкыс иамоуп ҳҳәынҭқарра иахәаша аҟазацәа-ҿарацәа разыҟаҵара, реиҵааӡара. Аус руеит аҧышәа змоу арҵаҩцәа. Аҵара процесс еиҿкаауп Урыстәылатәи астандартқәа ирықәшәо апрограммақәа рыла. Алеқциақәеи, асеминарқәеи, апрактикатә усурақәеи инарҷыданы, ирлас-ырласны имҩаҧысуеит атематикатә хәылҧазқәа. Арҵагатә программа инақәыршәаны, астудентцәа рзаанаҭ ала апрактика иахысуеит.

Тҟәарчалтәи  агәыҳалалра-ааглыхратә ҵараиурҭа аиҳабы Ерик Ҷкадуа, «Жәларбжьаратәи афонд Аҧсны» ахада Сенер Гогәу иҭабуп ҳәа иеиҳәеит иҟаиҵаз ацхырааразы.

«Шәара иҳашәҭаз ацхыраара иабзоураны,  лассы ҳара ҳҵараиурҭаҿы иааҳартуеит акомпиутертә-ҽазыҟаҵарҭатә курсқәа. Уи иаднаҧхьало аҿар рхыҧхьаӡара хымҧада ирацәаҩхоит. Агәра шәҳаргоит, ҳҵаҩцәа шәџьабаа шыдмырӡуа, еилкаараыла иҟашәҵаз аус ишазнеиуа»-иҳәеит аҵараиурҭа аиҳабы Ерик Ҷкадуа.

Ахәҭакахьала, «Жәларбжьаратәи афонд Аҧсны» ахада  Сенер Гогәуа иҳәеит, Тҟәарчалтәи аҵараиурҭа аҧхьаҟагьы афонд ахьӡала аматериалтә цхыраара шаҭахо.

«Сара ажәалагала ҟасҵоит, абри аҵараиурҭаҿы иаартхараны иҟоу акомпиутертә ҽазыҟаҵарҭатә курсқәа ахьымҩаҧысуа ауада,  ҳџьынџьуаҩ Омар Беигәаа ихьӡ ахҵазарц. Ажәа шәысҭоит даҽа ҧшькомпиутерк ҳамҭас ишышәзааҳго. Насгьы, аргыларатә маҭәахәқәа рыла адгылара, ацхыраара шшәаҳҭо.  Тҟәарчал- ақалақь фырхаҵа  иамоу ахьӡ-аҧша, уи иахьатәи аҭагылазаашьа азгәаҭаны  ҷыдала ҳазнеиуеит, излаҳалшо ала ацхыраарагьы аҳҭарц ҳҭахәуп»-ҳәа азгәеиҭеит афонд ахада Сенер Гогәуа.

Тҟәарчал араион анапхгара, араионтә еизара адепутатцәа,  афонд Тҟәарчалтәи ахаҭарнакра, аҵараиурҭа арҵаҩратә еилазаара, астудентцәа даара гәахәала иазнеит «Жәларбжьаратәи афонд Аҧсны» иҟанаҵаз ацхыраареи, аҧхьаҟатәи русеицуразы иаадырҧшыз  агәаҳәареи.