«Жәларбжьаратәи афонд Аҧсны» усуратә визитла Москва иҟан.

Ҧхынгәы 26 инаркны 29-нӡа, Ауаажәларратә еиҿкаара «Жәларбжьаратәи афонд Аҧсны» ахада Сенер Гогәуеи, афонд аҟны иаҧҵоу жәларбжьаратәи аимадарақәа рхеилак аиҳабы Максим Ӷәынџьиеи, усуратә визитла Урыстәылатәи Афедерациа иаҭааит. Хымш Москва рыҟазаара иалагӡаны имҩаҧыргеит акыр аиҧыларақәа. Урҭ уахь рцара хықәкыс иаман Урыстәылатәи Афедерациа аҟны иаҧҵоу иҳәынҭқарратәым афондқәеи, афонд «Аҧсны» аҧхьаҟатәи аусеицуреи, аиҩызареи рыбжьаҵара. Еиҿкаан Москва инхо ҳдиаспореи дареи реиҧылара. Москва, жәлар рынхамҩа аихьӡарақәа рцәыргақәҵатә  павильион «Аҧсны» аҟны имҩаҧысит, Урыстәылеи Аҧсни русутә Еидгыла ахантәаҩы ихаҭыҧуаҩ Пиотр Бериозеи,  ҳделегациеи  реиқәшәара. Уаҟа, инарҭбааны иазааҭгылан «Жәларбжьаратәи афонд Аҧсны» имҩаҧнаго аусурақәа ртәы, иазгәаҭан аҧхьаҟа еицырзеиҧшу апроектқәа рыла, еиуеиҧшым ауснагӡатәқәа реиҿкаара. Ахәҭакахьала, Аҧсны аалыҵ Урыстәылатәи аџьармыкьахь ацәыргара.

Имҩаҧысит «Аҭыжьырҭатә ҩны Виџьил», афонд анапхгареи реиҧылара. Ирылацәажәеит аҧхьаҟатәи русеицуразы имаҷымкәа азҵаарақәа. Аҩганкгьы иазгәарҭеит иаарласны уи азы аиқәшаҳаҭра рнапы шаҵарыҩуа.

Асациологиатә ҭҵаарадыррақәа ркандидат, Адунеизегьтәи аҧсуа-абаза жәлар рконгресс ахада иабжьгаҩ Беслан Кобахьиеи, Аҧснытәи аделегациеи реиҧылараҿы иазааҭгылан, ҳажәлар аӡәк еиҧш еидгыланы, иахьыҟазаалак, Аҧсноума, уи анҭыҵ аума, рыхшыҩи рымчи еилаҵаны, ҧхьаҟа ҳазгаша аусқәа еиҿыркаалар шакәу. Адиаспора, аҳәынҭқарраҿы имҩаҧысуа ахҭысқәа ирылахәызарц шакәу. Дара ргәаанагарала, ауаажәларратә еиҿкаарақәа ас еиҧш иҟоу аус ацхраараҿы рхатә азнеишьа рымоуп. 

Иуль 29 рзы, имҩаҧысит, «Аполитикатә ҭҵаарақәа ринститут» адиректор, Урыстәылатәи ауаажәларратә палата алахәыла Сергеи Маркови дареи реиҧылара. Уаҟа ирылацәажәан, Аҧсны, агәыҳалалратәи, аҵарадырреи ирызкыу апроектқәа рырҿиара, аҿар реимадара арӷәӷәара. Аҧсны, Урыстәыла, Ҭырқәтәыла инхо адиаспора рыцхыраарала, еиуеиҧшым ахырхарҭақәа рыла, аҳәынҭқаррақәа рыбжьара аусеицуреи аимадареи аҳәаақәа рырҭбаара.

 «Жәларбжьаратәи афонд Аҧсны», ҳџьынџьуаа ахьынхо атәылақәа рҟны, иазҧхьагәанаҭоит ахаҭарнакрақәа раартра. Аҭыҧантәи аиҿкаарақәеи дареи русеицура, хымҧада асоциал-економикатә зҵаарақәа рыӡбара акырӡа иацхраауеит.