«Жәларбжьаратәи афонд Аҧсны» апресс-конференциа мҩаҧнагеит

Иахьа,  Иван Папасқьыр ихьӡ зху Аҟәатәи амилаҭтә библиотекаҿы «Жәларбжьаратәи афонд Аҧсны» аҧшьгарала имҩаҧысит ажурналистцәа злахәыз апаресс-конференциа.   Уи азкын афонд шықәсыктәи аусура аихшьаала ажурналистцәа реилыркаара. Апресс конференциа ааиртит «Жәларбжьаратәи афонд Аҧсны» амассатә информациатә хархәагақәеи ауаажәларреи реимадара ахеилак анапхгаҩы Гәрам Амқәаб. Уи ажәа ииҭеит афонд ахада Сенер Гогәуа.

Сенер Гогәуа иқәгылараҿы дазааҭгылеит афонд  ахықәкы, апроектқәа рҵакы, урҭ рышьақәгылашьеи реиҿкаареи ртәы,  иара убас, афонд аусура ахы инаркны иахьанӡа шаҟа ҧара рықәхарџьыз  еиуеиҧшым апроектқәа. Иара иазгәеиҭеит ҳтәылаҿы ишьақәгылаз адемографиа ишадҳәалоу афонд аусура.  Уи ажәахә аҿы иҳәеит афонд Аҧсны аполитика ишалахәым, ҳҳәынҭқарра анапы ахьынамӡо азҵаарақәа рҿы афонд адгылара шыҟанаҵо. Иара убас, афонд аусура зегьы Аҧсны аҿиара ишазку. Афонд аструктура далацәажәауа, Сенер Гогәуа иҳәеит Ҭырқәтәылеи, аҧсуаа ахьынхо  егьырҭ аҳәынҭқаррақәеи рҿы ахаҭарнакцәа шыҟоу. Урҭи ҳареи аимадара бзиа  шҳабжьоу.

Анаҩс, ажәа лыман «Жәларбжьаратәи афонд Аҧсны» амаӡаныҟәгаҩ хада Асида Инаҧшьҧҳа. Уи лықәгылараҿы  иаартны   ажурналистцәа ирыдылгалаз ажәахә аҿы дазааҭгылеит афонд ҩышықәса ирылагӡаны еиҿнакааз апроектқәа. Хаҭала: «Ани амаалықьи», «Аҧеиҧш», «Агәыразра», «Агәабзиара», «Агәамч», «Ақәранҵыра», «Атеатри ахәыҷқәеи», «Адырра ҿыц» ирықәхарџьыз аҧара.  Инеидкыланы 2015 ш. азы уи иартәеит - 7 913 331 миллион  мааҭ, 2016 ш.  азы 23 934 294 миллион мааҭ.  

Асида Инаҧшьҧҳа лықәгылараҿы дазааҭгылеит ҿыц зҭыҵра иалагаз ажурнал «Аҧсынтәыла сара стәыла» . Уи ажурналистцәа иреиллыркааит ажурнал ҧсышәа мацарала ишҭыҵуа, аха уи аиҭагақәа : урысшәала, англыз бызшәала, ҭырқәшәала, араб бызшәала аелектронтә версиа афонд ахатә саит аҿы  ишыҟоу. Уи иаҧхьарц зҭаху ишилшо абри адрес ала ашьҭаҵаара: www.fondapsny.org.

 Иара убас, апресс конференциаҿы  ажурналистцәа иқәдыргылоз азҵаарақәа рҭакқәа ҟарҵеит афонд ахаҭарнакцәа.

Амаӡаныҟәгаҩ хада Асида Инаҧшьҧҳа лаҳасабырбатә ажәахә хазы шәаҧхьарц шәылшоит  «Жәларбжьаратәи афонд Аҧсны» асаит аҟны : www.fondapsny.org