Ҭырқәтәылатәи Ареспублика Аҩадатәи Кипр иҟоу Аҧснытәи аделегациа русуратә еиҧыларақәа ирыцҵоуп.

Аделегациа аилазаараҿы иҟоуп «Жәларбжьаратәи афонд Аҧсны» ахада Сенер Гогәуа, Аҧсны аҵареи, аҭҵаарадырреи рминистр Адгәыр Какоба. Урҭ уа рыҟазаара иалагӡаны акыр аиҧыларақәа мҩаҧыргеит.

Цәыббра 8 рзы, Аҩадатәи Кипр апарламент ахада, хылҵшьҭрала иадыгоу,  Сибель Сибер, аофициалла Аҧснытәи аделегациа лыдылкеит. Апарламент ахада инарҭбааны илзеиҭаҳәан Аҧсны аҭоурых, уи иахьатәи аҭагылазаашьа.  Аҧсуа жәлар аибашьратә мҩа ианысны, аҭынч ҧсҭазаара, аизҳазыӷьара, аҿиара мҩа ишану.  Сибель Сибер иазгәалҭеит Аҧсныҟа аара шылҭахыу, шьала-дала еизааигәоу аҧсуа-адыга жәларқәа рыешьара шырӷәӷәалатәу, аиҭанаиааира аҳәаақәа шырҭбаалатәу.

«Сара сызланхо ажәлар, 50 шықәса раахыс  ахақәиҭреи, ахьыҧшымреи иазықәҧоит. Урҭ рхықәкы наӡар сҭахыуп. Шәареи ҳареи ҳаиҭанаиааира, хымҧада,  еиҳа ҳаизааигәаны ҳаибадырыртә еиҧш алшара ҳнаҭоит. Ҳтәылаҿы шәбара, даара гәахәала исыдыскылеит. Агәра ганы сыҟоуп ҳусеицура амҽхак аҧхьаҟа иҵегьы ишацҵахо»-ҳәа азгәалҭеит апарламент ахада.

Ахәҭакахьала, Аҧснытәи аделегациа Апарламент ахада илзеиҭарҳәеит, Аҩадатәи Кипр рыҟазаара иалагӡаны акыр аиҧыларақәа ишрылахәыз.

«Сара даара ахә ҳаракны исшьоит Кипртәи иреиҳау аҵараиурҭақәа рыҩаӡара аҳаракыра. Астудентцәа ироуа адырра бзиа. Арҵаҩратә еилазаара рбаҩхатәреи, ииашаны ишьақәгылоу аҵаратә процесси   ирыбзоураны, атәым ҳәынҭқаррақәа рҟынтә шәуниверситетқәа  рахь аҵара зҵарц иаауа рхыҧхьаӡара даара ирацәоуп. Уи даара иҿырҧшы бзианы иаҳзааиуеит»-иҳәеит Аҧсны аҵареи, аҭҵаара дырреи рминистр Адгәыр Какоба.

 Аиҧылара хыркәшауа, «Жәларбжьаратәи афонд Аҧсны» ахада Сенер Гогәуа, Кипртәи апарламент ахада ҭабуп ҳәа леиҳәеит, аамҭа ҧшааны,  гәаартыла еицәажәартә еиҧш аҭагылазаашьа ахьаҧылҵаз. Иара убас, гәаларшәагас аҳамҭақәа еимырдеит.