Иорданиатәи ачерқьес школ иаҭааит Аҧснытәи аделегациа

Арҭ амшқәа рзы Иорданиа иҟаз Аҧснытәи аделегациа аҭааит Кавказтәи адиаспора аҵаҩцәа аҵара ахьырҵо  апринц Хамза ихьӡ зху  ачерқьес школ. Акыр шықәса ари ашкол ахәыҷкәа ахьырааӡоз, аҵара ддырҵарц рҽахьазыршәоз ҭыҧын. Ас еиҧш  Иорданиатәи апринц Хамза иан ианылба, илыӡбеит аҭагылазаашьа бзи рзаҧылҵарц аҵаҩцәеи, ааӡаҩцәеи, арҵаҩцәеи. Убри аҟынтә аҳкәажә иаҧшьылгеит ахыбра ҿыц лыргыларц, анаҩс  уи официалла бжьаратә ҵараиурҭаны иҟалеит. Ахыбра  анаадыртуаз амш аҽны, аҳкәажә ҿыц ииз лысаби Хамза длыманы дааит, аҳәарагьы ҟалҵеит апринц хәыҷы ихьӡ ахырҵарц. Убри нахыс апринц Хамза ихьӡ зху,  Кавказаа аҵара ахьырҵо ачерқьесқәа  ирышколны иҟалеит.

Аҧснытәи аделегациа ари ашкол аҟны  ирбаз-ираҳаз даара гәахәала ирыдыркылеит. Насгьы, ахҵәара иақәшәаз ҳауаажәлар рхылҵшьҭрақәа рзы ҷыдала иргылоу ашкол даҽа тәылак аҿы иуҧылаӡом Иорданиа ада. Ашкол аҟны аҵаратә процесс мҩаҧысуеит хҩаӡаракны, иара убас  аус ауеит ахәыҷбаҳча. Аҵаҩцәа аҵара ддырҵоит адыга бызшәала аҟабарда диалект шьаҭас иаҭаны.

«Иорданиа ҳара ҳазҭааз ашкол аҟны аҵара рҵоит 1000-ҩык инареиҳаны, уажәы ахыбра аҿыц аргылара иаҿуп аҵаҩцәа рхыҧхьаӡара иахьацло инамаданы. Аҧхьаҟа алшара ҟаҳҵоит Аҧснынтә арҵаҩцәа Иорданиаҟа рышьҭра, ахәыҷқәа Аҧсны аҭоурых реилыркааразы, аҧсуа бызшәа дырҵаразы»-ҳәа азгәеиҭеит  «Жәларбжьаратәи афонд Аҧсны» ахада Сенер Гогәуа.

 Ашкол аиҳабы уи даара ахә ҳаракны илшьеит. Илҳәеит аҧхынтәи аҧсшьара мшқәа рзы ахәыҷқәа реиҭныҧсахларазы ирыдгалоу  апрограмма ҿыц  дшақәшаҳаҭу.

Аиҧылара ахыркәшамҭазы Сенер Гогәуа ашкол аҵаҩцәеи арҵаҩцәеи аизҳазыӷьареи, ақәҿиарақәеи рзеиӷьеишьеит.   Чыдалатәи ашәҟәаҿы игәаанагарақәа аниҵеит. Ашкол аҧаратә ҳамҭа анеишьеит. 

Subscribe to Syndicate