Аҧсуара атемала имҩаҧысит Астол гьежь: «Ҳазҭагылоу аамҭа, аҵас, ақьабз»

Ауаажәларратә еиҿкаара «Жәларбжьаратәи афонд Аҧсны» аҧшьгарала, Аҟәа ақалақь, асасааирҭа Атриум-Викториа аконференц зал аҟны имҩаҧысит аҧсуара атемала Астол гьежь: «Ҳазҭагылоу аамҭа, аҵас, ақьабз». Уи рхы аладырхәит, ауаажәларратәи-аполитикатәи усзуцәа, Аҧсны Жәлар реизара адепутатцәа, аҵарауаа.

 Аизара алагамҭазы, еизаз минуҭктәи ҿымҭрала дыргәаладыршәеит,  зыҧсҭазаара иалҵыз, ауаажәларра-политикатә  усзуҩ Константин Озган. Анаҩс, ииасын Астол гьежь аофициалтә хәҭахьы. Уи аартуа, афонд акультуреи аҵарадырреи аҟәша анапхгаҩы Нугзар Логәуа иҳәеит, аҧсуаа рҭоурыхтә ҧсадгьыл аҟны иаҧшәымацәаны иҟаларц азы, ҳаҧсуа ҵасқәа ҳрықәныҟәаларц шакәу. Ҳҳәынҭқарра аргылараҿы зегь раҧхьа,  аҧсуара ҳаргылар шакәу.

Анаҩс, ажәа змаз «Жәларбжьаратәи афонд Аҧсны» ахада Сенер Гогәуа иазгәеиҭеит, афонд хықәкыс иамоу, зегь раҧхьа иргыланы аҧсуара аҧҟарақәа рықәныҟәара. «Аҧсуара-ҳара ҳзы ҵасуп, қьабзуп, динуп»-иҳәеит иара.

Аизара иалахәыз алшара рыман аинтерес зҵаз ажәахәқәа рыла иқәгылаз аҵарауаа, ауаажәларратәи-аполитикатәи усзуцәа рықәгыларақәа.

Ажәахәқәа ҟарҵеит:

Амқәаб Гурам; Аҭоурыхтә ҭҵаарадыррақәа ркандидат, Аҧснытәи аҳәынҭқарратә университет ажурналистика акафедра анапхгаҩы, адоцент, «Жәларбжьаратәи афонд Аҧсны» амассатә-информациатә  хархәагақәеи, ауаажәларратә еимадареи рхеилак аиҳабы  -  «Аҧсуа культура аҭҵаара дырра ахырхарҭақәа».

Дамениа Олег; Аҧсны аҳәынҭқарра ахада  иҟны иаҧҵоу астратегиатә ҭҵаарақәа рцентр адиректор, афиласофиатә ҭҵаарадыррақәа ркандидат,  – «Иамоума алҵшьа аамҭа уадаҩ?».

Бигәаа Валери; Аҭоурых ҭҵаарадыррақәа рдоктор – «Аҧсуа рыбзазаратә культура:  иацы, иахьа, уаҵәы».

Кәыҵниаҧҳа Мзиа; Афиласофиатә ҭҵаарадыррақәа ркандидат, Аҧснытәи аҳәынҭқарратә университет адоцент – «Аҧсуа ҳәынҭқарреи,  аҧсуа жәлари  ррефлеқсиа».

Дбар Роман; Аҧсны аҭҵаарадыррақәа ракадемиа Аекологиа аинститут адиректор, аамҭала амаӡаныҟәгаҩ инапынҵа назыгӡо – «Аҧсуаа,  аҧсабара аиқәырхареи, ахьчареи, жәытә ҵасла ишныҟәыргоз, уи ҳаамҭазы хархәарас иамоу?»

Агрба Ирина; Аҭоурых ҭҵаарадыррақәа ркандидат-«Сахьаҧсыуоу сазгәыдууп».

Кәыҵниаҧҳа Гунда;  Аҧсуа бызшәа аҿиара аҳәынҭкқарратә фонд адиректор – «Аҧсуа бызшәеи алитературеи рроль Аҧсуа  ҳәынҭқарра ашьақәыргылараҿы».

Асҭанда Ҳашҧҳа; - Аҧсуа ҭҵаарадырратә институт аполитологиеи, аконфликтологиеи рыҟәша русзуҩ еиҵбы,  аҭоурыхҭҵаарадыррақәа ркандидат – «Аҧсуаа рыҿиаратә ҭагылазаашьа».

 Арда Ашәба - афилалогиатә ҭҵаарадыррақәа ркандидат, ААУ афилалогиатә факу.льтет адекан  - «Традициала аҧсуа рықәра, рыбӷара: иацы, иахьа».

Ҷкотуа Оқтаи – «Жәларбжьаратәи афонд Аҧсны» аҧсуара аҟәша анапхгаҩы.

Астол гьежь аҿы ргәаанагарақәа рҳәеит Аҧсны Жәлар реизара аиҳабы ихаҭыҧуаҩ Емма Гамсаниаҧҳа, адепутат Валери Кәарҷиа, Аҧсны аҳәынҭқарра ахада ицхырраҩ абызшәатә политиказы Ҭали Џьапуаҧҳа, Нугзар Ашәба, ажурнал «Алашара» аредактор хада Анатоли Лагәлаа, ажурналист Вахтанг Аҧҳазоу уҳәа аӡәырҩы. 

Subscribe to Syndicate