«Жәларбжьаратәи афонд Аҧсны» ахада ихаҭыҧуаҩ Мақсим Ӷәынџьиа усуратә визитла Испаниа дыҟоуп

Акультуратә цәыргақәҵатә центр «Табакалер» имҩаҧысуеит афранцыз режиссиор Ерик Бодлер ицәыргақәҵа. Ацәыргақәҵа аҳәаақәа ирҭагӡаны иӡыргоуп афильм «Асалам шәҟәқәа Мақс иахь» захьӡу, иара убас (Не посольство Абхазии).«Жәларбжьаратәи афонд Аҧсны»  ахада ихаҭыҧуаҩ Мақсим Ӷәынџьиа иусбарҭаҿы идикылоит хыҧхьаӡара рацәала асасцәа, урҭ рыбжьара иҟоуп ажурналистцәа, аҭҵааҩцәа, афилософцәа, иара убас Аҧсны акультура, иааидкыланы атәыла аҿатә ҧсҭазаара иазҿлымҳау зегьы. Зыӡбахә азгәаҭоу апроект «Не посольство Абхазии» хацыркын 2014 ш. рзы, Париж.

«Хышықәса ирылагӡаны Аҧсны акультура ахаҭарнакра ӡыраҳгон Норвегиа, Еиду Америкатәи Аштатқәа, Арабтәи Аемиратқәа, иахьа ҳара ҳаҟоуп абаскқәа ртәыла. Ерик Бодлер,  егьырҭ  иусумҭақәагьы  акыр аинтерес рыҵоуп. Урҭ иаадырҧшуеит аҳәынҭқаррақәа, ажәларқәа рзы идырым афактқәа»-ҳәа азгәеиҭеит Мақсим Ӷәынџьиа.

Абаскцәа,  Аҧсны апроблемақәа ирызҿлымҳауп. Аҧсуаа ҳаиҧш, абаскцәа хадаратәла иашьҭоуп ркультуреи рбызшәеи реиқәырхара.  Урҭ акыр акаҳарақәеи, ахаларақәеи ҧыршәахьеит.

«Абаскцәа ахьыҧшымра рцәыӡит 1937 ш. рзы. Иара убас, Франко ихаан акыр агәаҟрақәа рхыргеит, рбызшәа шьаҭанкыла ақәхра аамҭа иҭагылан. Егьа уадаҩра рхыргазаргьы, абаскцәа ирылдыршеит ркультура, рбызшәа аиқәырхара. Иахьа, абызшәа аҿиара иазку апроектқәа аус рыдырулоит. Аҧсны ишҳамоу еиҧш, уаҟа аус руеит абызшәа аинститут, акультуреи абызшәеи рыҿиаразы ахеилакқәа»-иҳәеит Ӷәынџьиа.

Абаскцәа Аҧсынтәыла ашҟа ирымоу ахьыҧшымра азҵаарақәа ахадаратә  ҭыҧ ааныркылаӡом, дара еиҳарак изызҿлымҳау ҳкультура аҿиара иадҳәалоу аҭҵааратә усқәа роуп.

«Аҧхьаҟа иазгәаҭазар бзиоуп   Аҧсни абаскцәа ртәылеи рыбжьара ауаажәларра-ҭҵааратә  еимадаракәа  ирызку апроектқәа. Иазгәасҭарц сҭахуп,  «Не посольство Абхазии» даара ихҭыс дуны ишыҟалаз Сан Себастиан акультуратә ҧсҭазаараҿы»-ҳәа азгәеиҭоит Мақсим Ӷәынџьиа.

 Испаниа имҩасуаз аусуратә еиҧыларақәа рнаҩс, «Жәларбжьаратәи афонд Аҧсны» ахада Мақсим Ӷәынџьа апресс-конференциа мҩаҧигеит ажурналистцәеи ауаажәларратә хаҭарнакцәеи рзы. 

Subscribe to Syndicate