Октиабр 27- Аҧсуа бызшәа иамш ныҳәоуп!

Дарбанызаалак ауаҩы, иара ихатәы лахьынҵа шизшоу еиҧш, Аҧсадгьыл иамоуп иара ахатәы разҟы, ахатәы лахьынҵа, изнысхьоу аҭоурыхтә мҩа, иацтәи, иахьатәи амш, уаҵәтәи агәыӷра…

Амшын нырцә ихырҵәаз ҳауаажәлар, Аҧсны изныҵыз аҭыҧқәа иреиҧшыз ҧшааны, раҧсуареи, рхатәы бызшәеи ирыхӡыӡаауа анхара рҽазыркит. Уижьҭеи аамҭақәа цеит иниакәкәа.

Зхатәы бызшәала ашәак мҳәакәа изырхәлахьада?! Аха,  Ҭырқәтәыла дынхоны, даҧсыуаны, ашәак зҳәахьада? Иҳәахьацзаргьы, шаҟа гәырҩеи, шаҟа хьааи аҵаҵәахыузеи? Ас еиҧш иҟоу ҳџьынџьуаа рхәыцрақәа, заҟа уарҳәоузеи? Егьа убас акәзаргьы, ргәы карыжьуам, изланхо атәым милаҭ  иныҟәырго раҧсуара ала иаарылукаартә иҟоуп, аҧсы ҭоуп раҧсуара. Дара изларҳәо ала, аҧсуа бызшәа ашьҭыбжь анырҵәыӡ, аӡы зҵабаз аҧсыӡ ишаҩызахо.

«Ҳара, Аҧсны азы  ҳгәы былуеит. Аха, уи амацара азхаӡом. Сара, хылҵшьҭрала субыхыуп. Аҧсышәала исҭахыу сҳәаратәы сыҟоуп. Уи сара сазгәыдууп. Сабду Аҧснынтә дыхҵәаны дааит. Ара дыҩнрахеит. Ԥҳәысс Ҳәаҷааҧҳа дигеит. Бычка ақыҭаҿы ҳанхон. Схәыҷра ашықәсқәа рзы исгәалашәоит, ҳқыҭаҿы ҭырқәшәала ицәажәоз уаҩ дҳаламызт. Зегьы аҧсшәа акәын ирҳәоз»-дҳацәажәон Измиҭ ақалақь аҿы иҳақәшәаз Емын Бырзеқь.

Аҳаанырцә инхо аҧсуаа, рхатәы бызшәа аиқәырхара, уи мырӡкәа изызҳауа абиҧарақәа рызнагара иашьҭоуп.

«Сгәы иҵхо исҳәарц исҭахыу рацәоуп, аха ишысҭахыу сызцәажәом. Ухатәы бызшәала,  иуҭахыу анузымҳәо,  уи еиҳау рыцҳара ыҟам. Ара ҳаҧсшәа, ишшәаҳауа еиҧш, ирыцҳауп. Сара  сыуаҩыбжара сынҭысхьеит, саҧсшәа шпҟа ихьысҳау жәбоит, ҳара иҳаиҵбацәоу раҧсшәа шыҟоу шәазхәыц. Ҳаҧсшәа ҳахьынҳалоуп»-дцәажәон Нуран Ашәҧҳа.

«Сара Нуран лаҳәшьеиҵбы соуп. Аҧсны сцахьеит, схәыҷы дсыманы снеит. Уа ҳанхарц ҳҭахын. Аҳа, сыҧшәма данычмазаҩха, арахь аара ҳақәшәеит.  Сахьнеиз избаз сеигәырӷьеит. Ҳаҧсадгьыл сгәы азыблит. Ҳаиҵбацәа ирдырроуп абызшәа.   Аӡы иалоу аҧсыӡ аӡы ианалҵлак ишҧаҟьҧаҟьуа еиҧш,  ҳҧаҟьҧаҟьуеит. Ҳандуцәеи ҳабдуцәеи аҭырқәшәа ахьырзымдыруаз  азы, иаҳҵеит аҧсшәа.  Избанзар, ҳлымҳа иаҳауан. Ҳамыҧхьакәа, ҳамҩыкәа иаҳҵаз ауп. Ҳаиҳабацәа иаҳдырбаз аҧсуара ныҟәаҳгоит»-лгәы хьаауа лыгәҭыхақәа ҳзеиҭалҳәон Шьуқран.

Ҭырқәтәыла инхо аҧсуаа, ркультура аиқәырхаразы, еиҿкааны ирымоуп адернеқьқәа, ахеидкылақәа. Уаҟа рҽазыршәоит рхатәы бызшәа аҵара.

«Сара, Адаҧазар ақалақь, Каилак ақыҭа сеиуоуп. Ара инхо аҧсуаа, рхатәы бызшәа дырҵаразы акурсқәа мҩаҧызгоит. Ахәыҷы инаиркны аду иҟынӡа ргәы ацҧыҳәаны иаауеит. Иҟоуп зхатәы бызшәа здыруа, аха аҩышьа , аҧхьашьа зҵар зҭахыу. Иҟоуп зынӡа ажәак ззымдыруагьы. Знык абызшәа агьама ркыр, ирымҵарц залшом. Уи сара сҧышәа иснарбеит. Сара Аҧсны, сҵара дырра аизырҳаразы акурсқәа сырхысит. Уи сус акыр иацхраауеит»-иҳәеит аҧсуа бызшәа арҵаҩы Ирфан Хәаҷаа.

Абасала, зыҧсадгьыли збызшәеи гәхьаазго, атәым ҳәынҭқарраҿы инхо аҧсуаа, изларылшо ала, милаҭк аҳасабала ахеиқәырхара иашьҭоуп. Дара рыхдырраҿы аҭыҧ аанакылоит абарҭ ажәақәа: Ныӡаарас иҟоу тәым дгьылуп, ҧсҭазаарас иҟоуп ҧсадгьылуп!