Европатәи аидгылеи (ЕА) – Бырзентәылеи рыстратегиатә еилахәыра.

Ишыжәдыруа еиҧш, ЕА иаарласны Бырзентәыла алахәыларахь иаднакылахьан.
Убри аамҭазы, абырзенцәа ргәыӷрақәагьы акырӡа иҭбаан. Аекономикатә ҭышәынтәалареи, ааглыхра аизырҳареи, аусурҭа ҿыцқәа раҧҵареи, аҵара ахаҭабзиара ашьҭыхреи, абанктә система арӷәӷәареи  уҳәа, аҧсҭазаара аганқәа зегьы рҟны,  Европатәи Аидгыла иҟаҵараны иҟаз ацхыраара иазыҧшын.
Иахьа, иахьнанагаз акәзар, ажәытә аасҭа еицәамзар, еиӷьӡам. Бырзентәыла иреиӷьыз акадрқәа, ахныҟәгара азы егьырҭ аҳәынҭқаррақәа рахь ихҵәахьеит. Европатәи Аидгыла иаҧшьнагаз астандарт ҿыцқәа рымшала, раарыхра еиҳагьы ихыбгалеит. Атәыла адәқьанқәа, егьырҭ аҳәынҭқаррақәа иаадрыхыз аалыҵқәа рыла иҭәит. Амилаҭтә банк асистема елыбгахьеит, афинанстә хырхарҭақәа зегьы атәымуаа рнапахьы ииасхьеит, аҳәынҭқарра аусзуҩцәа руалафахәы азымшәо аҟынӡа инеихьеит. Аусура зынӡа бзиа изымбоз абырзенқәа, атуризм мацара ирзаанагоз иақәгәыӷны, Европатәи Аидгыла аҟынтә иааран иҟаз акредитқәа ирзыҧшуа анхара иаҿын.
Аҵыхәтәа: «Адунеи зегь иреиҳау амшынтә транспорт ҳнапаҿы иҟоуп, атуризм иаҳзаанагогьы  ҳекономика азхара акәым, иагьахашәалоит»,-ҳәа шырҳәоз, еихәлаҳаз ҳәынҭқарраны иаақәгылт!..  Иахьа зекономика знапа́ҿы иҟам, зуалафахәы ззымшәо, збанктә система хыбгалаз, ауал иакыз, уаҵәтәи амш азы агәыӷра ахьрымам азы зуааҧсыра атәыла анҭыҵҟа ицаз, ажәакала, амилаҭтә беиарақәа зегьы зцәыӡыз, атәымуаа ирымпыҵахалахаз акәхеит Бырзентәыла. Шаҟа ишәарҭоузеи, ус ауми? Ибзиаӡаны иҭҵааны, алкаа ҟаҵаны, ҿырҧштәыс иаҳгаша ҧышәоуп Бырзентәыла аҭагылазаашьа. Зхатәы политика аҧызымҵаз, зхатәы економика иазхьамыҧшыз, аҳәынҭқаррақәа рҵыхәтәа,  абас ауп ишыҟало...
Ҳарҭ аҧсуаа, ҳаҧсадгьыли ҳдиаспореи рымчқәа еибыҭаны, ҳхатәы политика аҧаҳҵартә еиҧш аамҭа мааиӡеи? Сара шәсазҵаауазар, иагьҳаҩсхьеит.

Сенер Гогәуа
«Жәларбжьаратәи афонд Аҧсны» ахада.