«Аҧсны - шьаҿак ҧхьаҟа» - «Жәларабжьаратәи афонд Аҧсны» аекономикатә форум.

Embedded thumbnail for «Аҧсны - шьаҿак ҧхьаҟа» - «Жәларабжьаратәи афонд Аҧсны» аекономикатә форум.

Ауаажәларратә еиҿкаара «Жәларбжьаратәи афонд Аҧсны» аҧшьгарала,  иахьа, Аҟәа ақалақь, асасааирҭа «Атриум-Викториа» аконференц зал  аҟны имҩаҧысит  «Аҧсны-шьаҿак ҧхьаҟа» захьӡу аекономикатә форум. Уи рхы аладырхәит Аҧсны аҳәынҭқарра ахада Рауль Ҳаџьымба,  ҳтәыла аекономикеи, ақыҭанхаамҩеи рминистрцәа, иара убас егьырҭ аҳәынҭқарратәи ауаажәларратәи еиҿкаарақәа рхаҭарнакцәа.   Афорум  ахь ааҧхьара  рыман Урыстәылантәи, Ҭырқәтәылантәи, Индиантәи, Нхыҵ-Кавказынтәи асасцәа,    абизнес –лидерцәа,  аекспертцәа.  Урҭ Аҧснытәи рколлегацәеи дареи алшара рыман ҳтәыла аекономика аҿиара иадҳәалоу азҵаарақәа рылацәажәара, ргәаанагарақәа реибыҳәара, ахәҭакахьала, атуризми ақыҭанхамҩеи, ахәаахәҭреи  ирызкны.  Афорум ахьӡ-«Аҧсны-шьаҿак ҧхьаҟа»  ишьақәнарӷәӷәон уи иаанарҧшуаз ахшыҩҵак.

Афорум ааиртит «Жәларбжьаратәи афонд Аҧсны» афинансқәеи, аекономикатә ҿиареи, аинвестициеи рхеилак анапхгаҩы Абессалом Кәарҷиа. Иара дазааҭгылеит ҭоурыхтә екскурск аҳасаб ала,  Аҧсны аекономика аҭоурых.  Анаҩс, ажәа змаз «Жәларбжьаратәи афонд Аҧсны» ахада Сенер Гогәуа  иҳәеит, афонд еиҿнакаахьоу Астол гьежьқәа рахьтә ари аҧшьбатәи шакәу.

«Аҧсны аекономика аҿиара амҩақәа рыҧшаара хымҧадатәиуп, уи ҳҳәынҭқарра ашьақәыргылара аус аҟны акыр ицхыраагӡоуп. Аамҭаказы уи иаҧырхагаз амзызқәа ыҟан, аибашьра, аблокада уҳәа, аекономика еиҵазҟьоз ацәырҵрақәа. Иахьа, абра ҳаизеит аекономика аизҳазыӷьара иадҳәалоу азҵаарақәа ҳрылацәажәарц, аҳасабырбатәқәа ҳадаҳкыларц»-ҳәа азгәеиҭеит Сенер Гогәуа.

Аҧсны аграриатә  ассоциациа ахантәаҩы Џьамал Ешбеи, ақыҭанхамҩа аминистр Ҭемыр Ешбеи азааҭгылеит ақыҭанхамҩа  аҿиара иадҳәалоу ауадаҩрақәеи азҵаарақәеи ртәы.  ООО «Ацетук Тревел» адиректор хада Анна Калиагина,  еко туризм аҿиаразы ажәалагалақәа ҟалҵеит. Аҧсны акурортқәеи атуризми рзы аминистр  ихаҭыҧуаҩ  Асҭамыр Ахба дазааҭгылеит атуризм ахырхарҭа ицәырнаго азҵаарақәеи,аҧхьаҟатәи аперспективақәеи. Аҧсны анаплакыҩцәа рассоциациа ахантәаҩы Роман Каҷараа агәаанагара ааирҧшит, ҳтәылаҿы абизнес знапы алаку ауаа адгылара рыҭазарц. Аҧсны аекономика аминистр Адгәыр Арӡынба иажәахә аҿы дазааҭгылеит, ҳтәыла аекономикатә ҭагылазаашьа,  уи аҳасабырбатәқәа, Аҧсны анапхгара уи ахырхарҭала имҩаҧырго ауснагӡатәқәа ртәы. Афорум актәи ахәҭа ахыркәшамҭазы  ажәахә ҟаиҵеит Аҧсны аҳәынҭқарра ахада Рауль Ҳаџьымба . Уи иқәгылараҿы иазгәеиҭеит:

«Ҳарҭ ҳамчи ҳахшыҩи еилаҵаны аусқәа рыӡбара напы аҳаркыроуп.  Атуризми, ақыҭанхамҩеи, ахәаахәҭреи инарҷыданы Аҧсны афымцамчы аҿиара ҳадгылароуп. Иҟоу ауадаҩрақәа ҳшырзааҭгыло еиҧш, урҭ рыӡбарагь ҳалҳаршароуп. Аҳәынҭқарра азыхиоуп еиуеиҧшым  ажәалагалақәа рзыӡырҩра, урҭ рыӡбараҟны адгылара аарҧшра»- иҳәеит Рауль Ҳаџьымба.

Афорум аҩбатәи ахәҭаҿы  иқәгылеит Жәларбжьаратәи аекспертцәа. Дара азааҭгылеит Аҧсны аекономика апотенциал, иара убас  рҧышәа ҳацеиҩыршеит аекономика аҿиара иадҳәалоу азҵаарақәа рзы. Ргәаанагарақәа рыла иқәгылеит: Барганџьиа Даур-аекономикатә ҭҵаарадыррақәа ркандидат, Бӷажәба  Андреи-ААУ аекономикатә факультет акафедра адоцент, Канболат Ҳасан-Анкаратәи  аполитикатә ҭҵаарақәа рцентр адиректор,  Чакрапани Аравамутан-ООО «Солар Транс» адиректор хада, Котвани Маноџь- Индиатәи абизнес Алианс ахада, Гордиенко Алеқсеи- Урыстәылатәи Афедерациа аҳәынҭқарратә абжьгаҩ, атуризм аганахь ала аспециалист, Косиков Николаи-ООО  «ТК Партниор»-адиректор хада, Хаџьметов Луан- атехникатә ҭҵаарадыррақәа рдоктор,  Ҟабарда-Балкариатәи аҳәынҭқарратә аграртә университет апрофессор, Ӷәынџьиа Мақсим-«Жәларбжьаратәи афонд Аҧсны» ахада ихаҭыҧуаҩ.

Иқәгылоз  ражәахәқәа рҟны инарҭбааны ирзааҭгылан Аҧсны ақыҭанхамҩа аҭагылазаашьеи уи аҿиареи, атуризм ахаҭабзиара ашьҭыхреи  уи ҧхьаҟатәи азгәаҭақәеи, ахәаахәҭра аус аизҳазыӷьара амҩақәа  рыҧшаареи,  аекономика аҿиара иадҳәалоу еиуеиҧшым ахырхарҭақәеи. Афорум ахыркәшамҭаз иҟаҵан ажәалагала ҿыцқәа. «Жәларбжьаратәи афонд Аҧсны» хықәкыс иамоуп аекономикатә форум аусура иазку аҭыжьымҭа  акьыҧхьра, иара убас еиҿкаахоит аекспертцәа русуратә гәыҧ, аекономикатә зҵаарақәа рыӡбара иадҳәалоу абжьгарақәа рышьақәыргыларазы, анаҩс уи  Аҧсны анапхгара  рҟынӡа инагахоит. 

Subscribe to Syndicate