Адунеизегьтәи аҧсуа-абаза жәлар абыжьбатәи рконгресс

Арҭ амшқәа рзы Аҟәа ақалақь аҿы имҩаҧысуеит Адунеизегьтәи аҧсуа-абаза жәлар а-7-тәи реизара ду.  Раҧхьатәи аконгресс мҩаҧган ҧхынҷкәынмза, 1992 ш. рзы Лыхны ақыҭан. Иара убраҟа алаҳәара ҟаҵан иаҧҵазарц Адунеизегьтәи абаза жәларқәа рассоциациа.

Аҧсны Аҳәынҭқарра раҧхьатәи ахада  Владислав Арӡынба, аибашьра анцоз аамҭазы  Аҧсны инхоз ажәлар рнаҩс,   аҳәаанырцә инхоз ҳауаажәлар  реидкылара илшеит.  Адунеизегьтәи аконгресс  иабзоураны, ҳауаажәлар адунеи ахы-аҵыхәа аҟынтә еигәныҩит, рымч-рылша еибырҭеит.

Адунеизегьтәи аҧсуа-абаза жәлар рассоциациа, аҧсуеи абазақәеи ррепатриациа аус ҳәаақәнаҵоит. 2006 ш. рзы,  Ассоциациа, Еиду Амилаҭқәа реиҿкаара амаӡаныҟәгаҩ хада Кофи Аннани, Жәларбжьаратәи аилазаареи рахь  асалам шәҟәы дәықәнаҵеит ари азҵаара аӡбаразы. Иара убас, Урыстәылеи Ҭырқәтәылеи рхадара рахь аҳәара ҟанаҵеит «аҭоурыхтә иаша ашьақәыргылареи, ҳхылҵшьҭрақәа рҭоурыхтә ҧсадгьыл ахь рырхынҳәреи аус аҟны ҧынгыла рымамзырц азы».

Адунеизегьтәи  аҧсуа-абаза жәлар  абыжьбатәи аконгресс аҟны хадаратәла иазааҭгылоит  ҳажәларқәа реимадареи, рыҿиареи рырӷәӷәара иадҳәалоу азҵаарақәа. 

Аконгресс  аусура рхы аладырхәит  Ааигәа Мрагыларатәи, Европатәи, Урыстәылатәи, Нхыҵ-Кавказтәи Ареспубликақәа рҟынтә  асасцәа.