Жәларбжьаратәи афонд Аҧсны ааҧхьара.

Ноиабр 24, 2015шықәса рзы,  Ҭырқәтәылатәи арра ҳауатә мчра иҭанархеит   Урыстәылатәи абомбакажьгатә ҳаирплан. Убри инамаданы, Ауаажәларратә еиҿкаара «Жәларбжьаратәи афонд Аҧсны»  гәалсрала ирыдышшылоит аҳаирплан аҟны иҭахаз,  Урыстәыла аррамаҵзура иахысуаз рҭаацәа.  

Ари ахҭыс ахҳәаа аҟаҵара уадаҩуп. Ҳгәы иаанагоит ас еиҧш иҟоу ацәгьаура алмыршара ахәҭан ҳәа.

Ҳара  Урыстәыла ҳадгылауа, иарбанзаалак атерроризм ҳақәыӡбоит. Убри аганахь ала, Урыстәыла атерроризм иаҿагыланы имҩаҧнаго аусқәа зегьы ҳрыдгылоит.

Урыстәылатәи Афедерациа ҳара ҳзы астратегиатәи, аиҩызаратәи ҟазшьа змоу  партниоруп. Ҭырқәтәылатәи Ареспублика, ҳтәыла аекономика аҿиараҟны ахадаратә ҭыҧ аанакылоит, уаҟа инхоит хыҧхьаӡара рацәала ҳдиаспора.  Ҳара агәра ҳгоит, аҩтәылакгьы рыжәларқәа,   Урыстәылеи Ҭырқәтәылеи реизыҟазаашьа аруадаҩра ишадымгыло.

Ҳара излаҳаҧхьаӡо ала, иҟалаз ахҭыс, аекономикеи, акультуреи, астратегиеи рганахь ала Урыстәылеи Ҭырқәтәылеи рыбжьара ааха ӷәӷәа  рнаҭоит,  русеицура иаҧырхагахоит.  Уи анымыҧшырц залшом ҳара ҳтәылагьы.

Агәыӷра ааҳарҧшуеит, аҩганкгьы иахәҭоу ақәҵара рыдыркылап ҳәа иҟалаз акризис инамаданы, насгьы ииашоу ахшыҩзышьҭра аадырҧшып ҳәа Урыстәылеи Ҭырқәтәылеи рыбжьара ҩаҧхьа аиҩызаратәи, аусеицуратәи ҟазшьа аиҭашьақәыргыларазы.

Аҟәа

Ноиабр 25, 2015ш.