Иорданиатәи аныҟәарақәа ирызку апресс конференциа

Ажьарныҳәа 12 инаркны 16-нӡа  «Жәларбжьаратәи афонд  Аҧсны» ахада Сенер Гогәу напхгара ззиуаз Аҧснытәи аделегациа Иорданиа иҟан. Аделегациа иалахәын: Аҧсны аекономика аминистрра  иатәу  аҳәынҭқарратә инвестициатә  маҵзура адиректор Алмас Ҭаниа,  «Жәларбжьаратәи афонд Аҧсны» ахьӡала Ҭырқәтәылатәи   ахаҭарнак  Џьенгиз Ашәба, афонд аусзуҩ Жанна Леиҧҳа, аусдкылаҩцәа  Витали Смыр,  Дмитри Аргәын, Беслан  Џьапуа, ауаажәларратә палата  алахәыла Низам Ҳаҧаҭ. 

 Иахьа, аделегациа алахәцәа  Иорданиатәи рныҟәарақәа ирызкны аинформациатә  маҵзура Sputnik аҟны имҩаҧгаз апресс конференциа рхы аладырхәит. Урҭ рықәгыларақәа рҟны иазгәарҭеит зегь раҧхьа уахь рцара ҳдиаспореи ҳареи ҳаимадарақәа рырӷәӷәара ишазку. Русура аҳәаақәа ирҭагӡаны Иорданиа  хырхарҭа рацәала аиҧыларақәа мҩаҧыргеит. Иазааҭгылеит  ҳтәыла аполитика, асоциал-економика, акультура иазкыз аинформациа.

«Иорданиа инхо ачерқьес диаспора,  дара изларҳәо ала, 100000-ҩык инарзынаҧшуеит. Урҭ рахьтә хәнызқьҩык  аҧсацәоуп.  Хаз-хазы еиҿкааны ирымоуп ахеидкылақәа, иҟоуп урҭ зегьы еидызкыло ассоциациа. Адыга бызшәала аус ауеит ателехәаҧшратә канал Нарҭ. 20 инарзынаҧшуа хырхарҭа рацәала аиҧыларақәа ҳрылахәын, урҭ рхыҧхьаӡараҿы иҟан  аҳәынҭқарратә усзуцәа, абизнесменцәа, ҳдиаспора рхаҭарнакцәа»-ҳәа азгәеиҭеит «Жәларбжьаратәи афонд Аҧсны» ахада Сенер  Гогәуа.

Аделегациа ахаҭарнакцәархы рхы аладырхәит  Амман ақалақь аҿы имҩаҧысыз ачерқьесқәа рцентр аиҳабы иалхрақәа. Маӡалатәи абжьыҭира инақәыршәаны ацентр еиҳабыс далхын  Зухди  Џьамбачыҟәа.

 Имҩаҧысит Аҧснытәи аделегациеи Иорданиатәи апринц Али бин аль-Хәссеини реиҧылара. Иара Аҧснытәи асасцәа даара гәахәала идикылеит. Аиҧылараҟны излазгәаҭаз ала апринц ианду лан  хылҵшьҭрала даҧсыуоуп.

Иорданиатәи апарламент адепутатцәеи ҳделегациеи реиҧылараҿы ишьҭыхын Аҧсны ахьыҧшымра азҵаара. Аҧхьаҟа аҩганкгьы рдепутатцәа злахәу аусуратә хеилак аҧҵара азҧхьагәаҭоуп.  Иара убас урҭ идикылеит Иорданиа иҟоу Урыстәылатәи Афедерациа ацҳаражәҳәаҩ. Аиҧылараҿы иазааҭгылан Аҧсни Урыстәылеи реизыҟазаашьа азҵаарақәа.  

«Ла иабоу хы иаҧсоуп . Уа инхо ҳдиаспора рынхашьа рынҵышьа даара сгәы иахәеит. Ҳара малс иҳамоу ҳашьцәа роуп. Аҳәынҭқарратә программа абри ахырхарҭала иӷәӷәаны аус ауроуп. Аҧсны иазку ииашоу аинформациа рымазароуп.  Аҿар аҵара бзиақәа рымоуп. Атәым ҳәынҭқаррақәа рҿы ҳаҭыр зқәу ҳашьцәа, хымҧада агәра згоит  рыҧсадгьыл аҿы аихьӡарақәа шырзыҧшу»-иҳәеит аусдкылаҩ Витали Смыр.

Аҧсны аекономика аминистрра  иатәу  аҳәынҭқарратә инвестициатә  маҵзура адиректор Алмас Ҭаниа иазгәеиҭеит, Иорданиа аекономика аҿиара аҩаӡара акыр ишыҳараку. Дазааҭгылеит Аҧсны аинвесторцәа радыҧхьалара азҵаара инарҭбааны ишалацәажәаз. Иазгәеиҭеит уи залыршахар, ҳтәыла асоциал-економикатә ҭагылазаашьа ахаҭабзиара акыр ишеиӷьхо.

Иара убас апресс конференциа зхы алазырхәыз Низам Ҳаҧаҭи, Дмитри Аргәыни азааҭгылеит шьаҿа-шьаҿала Аҧсны ахьӡ аҭыгаразы аусмҩаҧгатәқәа шеиҿкаалатәу. Иорданиа инхо ҳауаажәлар рымч-рылша шыҟоу, ҳҳәынҭқарра ашьақәыргылараҿы рҧышәа ахархәара шхымҧадпатәиу.

Апресс конференциаҟны Иорданиатәи аныҟәарақәа реихшьаала ҟаҵо, «Жәларбжьаратәи афонд Аҧсны» ахада Сенер Гогәуа иҳәеит, иаарласны Аҧснынтә Иорданиаҟа ҳџьынџьуаа аҧсшәа дырҵаразы арҵаҩцәа шдәықәҵахо, иара убас апринц Хамза ихьӡ зху ачерқьес школ аҟны Аҧсны иазку ауада шаартхо. Иорданиантәи ҳдиаспора Аҧсныҟа раара шазгәаҭо азеиҧш усқәа рылацәажәареи реиҿкаареи рзы.